اسلام آباد۔20جنوری (اے پی پی) صدر مملکت ڈاکٹر عارف علوی قوم توں اپیل کیتی جو قوم اپݨے نمائندے چݨݨ کیتے ذمہ واری نال ووٹ پاوے۔ انتخابات اتے ووٹنگ شہریاں کوں اپݨے نمائندیاں کوں احتیاط نال چݨݨ دا موقع ݙتے تانجو او معیاری قیادت ݙے تے ملک دی ترقی، خوشحالی تے ترقی دے رستے تے ٹور سڳن۔ او جمعے کوں پیر مہر علی شاہ بارانی زرعی یونیورسٹی راولپنڈی اچ نیشنل سینٹر آف انڈسٹریل بائیو ٹیکنالوجی دی افتتاحی تقریب توں خطاب کریندے پے ہن۔ ایں موقع تے سابق وزیر زراعت پنجاب سید حسین جہانیہ گردیزی، وائس چانسلر پروفیسر ڈاکٹر قمر الزمان وی خطاب کیتا۔ صدر مملکت ڈاکٹر عارف علوی آکھیا جو پاکستان اچ نظریات دی کوئی ڳھٹکی کائنی۔ انہاں آکھیا جو پاکستان کوں عقل تے مبنی ٻہوں ذمہ وار ادارے اتے نظام ٻݨاوݨ دی لوڑھ اے جیڑھے سمارٹ فیصلے کرݨ اتے ترقی یافتہ ملکاں نال ہم آہنگی دے قابل ہوون۔ انہاں آکھیا جو پاکستان ہک زرعی ملک ہووݨ دے باوجود بدقسمتی نال غذائی قلت اتے زرعی اجناس دا شکار اے۔ اساں اچ خود کفیل تھیوݨ اتے غذائی اجناس کوں ݙوجھے ملکاں کوں برآمد کرݨ دی صلاحیت موجود اے۔ ایں توں پہلے صدرمملکت ڈاکٹر عارف علوی یونیورسٹی اچ نیشنل سینٹر آف انڈسٹریل بائیو ٹیکنالوجی دا افتتاح کیتا۔ ایندے علاوہ سنٹر فار پریسژن ایگریکلچر اتے بگ ڈیٹا ایگریکلچر ریپوزٹری دا دورہ کیتا۔
.jpg)
