اسلام آباد۔29جنوری (اے پی پی):نگران وفاقی وزیر آئی ٹی و ٹیلی کمیونیکیشن ڈاکٹر عمر سیف آکھیے نینگراں کوں ملکی ترقی اچ حصہ پاوݨ سانڳے آئی ٹی سیکٹر کوں تکڑا کرݨا ہوسی ، آئی ٹی برآمدات نال معیشت تکڑی تھیسی ۔ گزریل ترائے سال اچ آئی ٹی اتے الیکٹرانکس دے شعبیں اچ کم تھئے ۔ڈاکٹر عمر سیف موبائل سمٹ 2024 توں خطاب کریندے پئے ہن ۔ جاز دے تعاون نال ٹیکنو دی طرفوں کیتے ونڄݨ آلے تے برانڈ اسپیکٹرم پاکستان دے ڈیزائن کیتے ڳئے سمٹ اچ ڈاکٹر عمر سیف بطور مہمان خصوصی شرکت کیتی۔ چیئرمین پی ٹی اے، ایس آئی ایف سی حکام، موبائل مینوفیکچرز، وزارت آئی ٹی دے افسراں سودھے ٹیلی کام انڈسٹری دی معروف شخصیات سمٹ اچ شرکت کیتی۔ڈاکٹر عمر سیف آکھیے پاکستان اچ آئی ٹی سیکٹر اچ جدت آندی پئی اے ، پاکستان اچ موبائل فونز دی تیاری نال قیمتاں گھٹ تھیسن، مقامی موبائل فونز دی تیاری نال زرمبادلہ دی بچت تھیسی ۔ڈاکٹر عمر سیف آکھیے ہݨ تئیں 35 کمپنیاں کوں لائسنس جاری تھی چکن جیڑھے جو مختلف برانڈز دے سمارٹ فونز اسمبل کریندے پئن ۔ڈاکٹر عمر سیف آکھیے مقامی سطح تے فائبر کیبل دی تیاری اچ وی پیشرفت تھئی اے ، مقامی سطح تے 4 کمپنیاں فائبر کیبل بݨیندیاں پئن ، 300 میگا ہرٹس سپیکٹرم نیلامی کیتے کیتا ویسی، جولائی یا اگست اچ فائیو جی اسپیکٹرم نیلامی کیتے پیش کریسن ، فائیو جی سپیکٹرم دی نیلامی سوکھیاں شرطاں تے رکھیسوں ایجھی پالیسی بݨیسوں جو کمپنیاں انفراسٹرکچر تےسرمایہ کاری کرسڳن ۔ سمٹ دا افتتاح وفاقی وزیر ڈاکٹر عمر سیف کیتا ایں کانفرنس کوں وزارت انفارمیشن ٹیکنالوجی و ٹیلی کام ،پاکستان ٹیلی کمیو نیکیشن اتھارٹی ،پاکستان سافٹ ویئر ایکسپورٹ بورڈ(پی ایس ای بی)اتے ٹیک نیشن پاکستان جیہے سرکاری ادایں تے پاکستان موبائل فونز مینوفیکچرز ایسوسی ایشن دا تعاون حاصل ہئی ۔ایں اہم ایونٹ اچ موبائل فون ایکو سسٹم دی اہم شخصیات موجود ہن جیں اچ حکومتی نمائندے ،آپریٹرز، ریگولیٹرز،مینو فیکچررز اتے ایپ ڈویلپرز توں گھن تے ڈیجیٹل تے مالی شمولیت نال پائیداری دی حمایت کرݨ آلے شامل ہن ۔ ایں سمٹ اچ شریک نامور شخصیات اچ ایئر لنک دے سی ای او مظفر حیات پراچہ ،چیئرمین پی ٹی اے میجر جنرل(ر)حفیظ الرحمان،ABACUSدی سی ای او فاطمہ اسد سعید،ٹیکنو الیکٹرونک دے سی ای او عامر اللہ والا،کنٹری جنرل منیجر کریم پاکستان محمد عمران سلیم،دراز دے سی ای او احسن سایا،برانڈ سپیکٹرم دے سی ای اوانور کبیر اتے ٻئے شامل ہن
