اسلام آباد۔10جولائی(اے پی پی) وفاقی کابینہ وزارتِ ہاؤسنگ اینڈ ورکس دی سفارش تے پاکستان پبلک ورکس ڈیپارٹمنٹ کوں ختم کرݨ دے لائحہ عمل دی منظوری ݙے ݙتی جݙاں جو کابینہ کوں ݙسایا ڳئے انفارمیشن ٹیکنالوجی، امورِ کشمیر و گلگت بلتستان، ریاستاں تے سرحدی امور، صنعت و پیداوار اتے قومی صحت دی وزارتاں دے غیر ضروری ذیلی اداریں کوں بند کرݨ تے ضروری اداریں دی رائٹ سائزنگ دے حوالے نال بنیادی معلومات گھنݨ دا عمل 12 جولائی تئیں مکمل تھی ویسی ایوں 19 جولائی توں وفاقی حکومت دی ٻئی وزارتاں توں ایں نوعیت دی معلومات گھن تے ٻئے اداریں کوں بند یا ضم کرݨ دی سفارشات بݨائیاں ویسن ۔وزیراعظم آفس دے میڈیا ونگ توں جاری پریس ریلیز موجب وزیراعظم محمد شہباز شریف دی صدارت اچ وفاقی کابینہ دا اجلاس تھیا ۔ وفاقی کابینہ وزارتِ ہاؤسنگ اینڈ ورکس دی سفارش تے پاکستان پبلک ورکس ڈیپارٹمنٹ کوں ختم کرݨ دے لائحہ عمل دی منظوری ݙے ݙتی۔ منظور تھیے لائحہ عمل موجب وفاقی ترقیاتی منصوبیں دی نگرانی سانڳے پاکستان انفراسٹرکچر ڈویلپمنٹ کمپنی بݨائی ویسی جݙاں جو وفاقی حکومت دی نگرانی اچ صوبائی نوعیت دے سارے ترقیاتی منصوبیں کوں متعلقہ صوبائی اداریں دے حوالے کیتا ویسی۔ ایویں پاک پی ڈبلیو ڈی کوں ݙتے ڳئے ݙیکھ بھال تے مرمت دے کم جاری رکھݨ سانڳے ایسیٹ اینڈ فیسیلیٹی مینجمنٹ کمپنی دا قیام عمل اچ گھن آیا ویسی ۔ پاک پی ڈبلیو ڈی دے عملے دی درجہ بندی دے بعد متعلقہ وزارتاں اچ منتقلی کیتی ویسی تے گولڈن ہینڈ شیک سکیم عمل اچ گھن آئی ویسی ۔ ملک اچ پاک پی ڈبلیو ڈی دی ساری املاک دے ریکارڈ دی کمپیوٹرائزیشن کیتی ویسی ۔ کابینہ ہدایت کیتی ٹرانزیشن دا اے عمل ݙو ہفتے اچ مکمل کیتا ونڄے ۔کابینہ کوں وزیر خزانہ دی سربراہی اچ حکومتی حجم کوں گھٹ کرݨ دے حوالے نال بݨائی ڳئی کمیٹی دی ہݨ تئیں دی پیشرفت تے بریفنگ ݙتی ڳئی۔ بریفنگ اچ ݙسایا ڳئے انفارمیشن ٹیکنالوجی، امورِ کشمیر و گلگت بلتستان، ریاستاں تے سرحدی امور، صنعت و پیداوار اتے قومی صحت دی وزارتاں دے غیر ضروری ذیلی اداریں کوں بند کرݨ تے ضروری اداریں دی رائٹ سائزنگ دے حوالے نال بنیادی معلومات ڳھدیاں ویندیاں پئن ، اے عمل 12 جولائی تئیں مکمل تھی ویسی انہاں معلومات دی بنا تے متعلقہ وزارتاں دی مشاورت نال تجویزاں بݨاتے کابینہ کوں اگست دے پہلے ہفتے تئیں پیش کریسی ۔ ایویں 19 جولائی توں وفاقی حکومت دی ٻئی وزارتاں توں ایں نوعیت دی معلومات گھن تے ٻئے اداریں کوں بند یا ضم کرݨ دی سفارشات بݨائیاں ویسں ۔ کابینہ ملک اچ قانونی طور تے رہݨ آلے 1.45 ملین افغان مہاجرین جنھاں دے پروف آف رجسٹریشن کارڈز دی معیاد 30 جون 2024 کوں مک ڳئی اے انھاں دے پی او آر کارڈز دی مدت اچ ھک سال یعنی 30 جون 2025 تئیں توسیع دی منظوری ݙتی۔ وفاقی کابینہ وزارتِ ہاؤسنگ اینڈ ورکس دی سفارش تے پشاور اچ فیڈرل لاج نمبر II دی عمارت کوں دفتری استعمال سانڳے الیکشن کمیشن آف پاکستان کوں منتقل کرݨ دی منظوری ݙتی ، ایں عمارت اچ صوبائی الیکشن کمشنر دا دفتر مستقل بنیاداں تے بݨایا ویسی ۔ وفاقی کابینہ وزارت قانون و انصاف دی سفارش تے ملک دے مختلف شہراں اچ اپیلٹ ٹربیونل ان لینڈ ریونیو دے بنچاں توں 7 اکاؤنٹنٹ ممبران کوں واپس ایف بی آر بھیجݨ تے وزارت دی طرفوں نامزد 14 افسراں کوں اپیلٹ ٹربیونل انلینڈ ریوینیو دے بینچاں تے تعینات کرݨ دی منظوری ݙتی وفاقی کابینہ وزارت صحت دی سفارش تے جوائنٹ سیکریٹری محمد اقبال کوں بطور منتظم نیشنل کاؤنسل فار ہومیوپیتھی تعینات کرݨ دی منظوری ݙتی ، وفاقی کابینہ وزارت قومی صحت دی سفارش تے پاکستان میڈیکل اینڈ ڈینٹل کونسل دے معیار تے پورانہ لہݨ بنا تے بہاولپور میڈیکل کالج دی 19 اپریل 2024 توں منی ڳئی حیثیت ختم کرݨ دی منظوری ݙتی ۔ ایں ادارے اچ زیر تعلیم طلباء کوں ملک دے ٻئے میڈیکل کالجز اچ منتقل کیتا ویسی ۔ وزیراعظم پچھیے جو غیر معیاری ہووݨ دے باوجود بہاولپور میڈیکل کالج کوں پی ایم ڈی سی تعلیمی سرگرمیاں جاری رکھݨ دی اجازت کیوں ݙتی ۔ وزیرِ اعظم پرائم منسٹر انسپکشن کمیشن کوں تحقیقات دا حکم وی ݙے ݙتا۔ وزیراعظم پی ایم ڈی سی دے معاملات دے حوالے نال وفاقی وزیر اقتصادی امور احد خان چیمہ، ڈپٹی چیئرمین پلاننگ کمیشن ڈاکٹر جہانزیب خان اتے وزیراعظم دے کوآرڈینیٹر صحت ملک مختار احمد بھرتھ تے مشتمل کمیٹی بݨا ݙتی تے انہاں کوں ہدایت جاری کیتی جو پی ایم ڈی سی دے تھرڈ پارٹی آڈٹ دے حوالے نال تجویزاں کابینہ دے اڳلے اجلاس اچ پیش کرن۔وفاقی کابینہ وزارت صحت دی سفارش تے ڈرگ ریگولیٹری اتھارٹی آف پاکستان دی اشتہاراں دے حوالے نال کمیٹی دے 17ویں اتے 18ویں اجلاس اچ مجوزہ دوائیں دے 53 اشتہاراں کوں ٹی وی، ریڈیو اتے اخباراں اچ تشہیر دی منظوری ݙتی۔وفاقی کابینہ کے-الیکٹرک دے بورڈ آف ڈائریکٹرز اچ حکومت پاکستان دی طرفوں جاوید قریشی کوں ڈائریکٹر تعینات کرݨ دی منظوری ݙتی ۔ وزیراعظم ہدایت کیتی سارے ریاستی اداریں دے غیر فعال اتے نا مکمل بورڈز آف ڈائریکٹرز اچ ݙو ہفتے اندر پیشہ ورانہ طور تے چنڳی شہرت رکھݨ آلے لوک تعینات کرتے انہاں کوں فعال بݨایا ونڄے ۔وفاقی کابینہ اقتصادی رابطہ کمیٹی دے 27 جون 2024 کوں تھیوݨ آلے اجلاس اچ ڳھدے ڳئے فیصلیں دی توثیق کرݙتی ۔وفاقی کابینہ سرکاری ملکیتی اداریں دے حوالے نال کابینہ کمیٹی دے 4 جولائی 2024 کوں تھیوݨ آلے اجلاس اچ ڳھدے ڳئے فیصلیں دی توثیق کرݙتی۔
