اسلام آباد ۔ 30دسمبر (اے پی پی) قومی احتساب بیورو (نیب) بدعنوان عناصر توں لٹی گی رقم دی واپسی سانگے پر عزم اے تے بلا امتیاز بد عنوانی اچ ملوث اشتہاریاں تے قانون توں لکنڑ آلیں دے نال اوکھے ہتھاں نال نبڑیا ویسی ۔ چیئرمین نیب جسٹس (ر) جاوید اقبال آکھیے جو گزریل ہک سال دے دوران نیب پکے ثبوت دی بنیاد تے بد عنوانی دے 440ریفرنس دائر کرنڑ دی منظوری ڈتی اے جڈاں جو قانون تے عمل در آمد دی موثر پالیسی دے تحت 503ملزماں کوں گرفتار کر گھدا گے ۔ نیب کوں 44 ہزار 315 شکایتاں ملن ،جیں اچوں ہک ہزار 713شکایتاں دی تصدیق ، 877 انکوائریاں اتے 227 تحقیقات دے نال قومی خزانے اچ 2580.196 ملین روپے وی جمع کرائے ہن ۔انہاں آکھیا 900 ارب روپے دی بدعنوانی دے حوالے نال ہک ہزار 210 ریفرنسز ملک دیاں مختلف احتساب عدالتاں اچ زیر سماعت ہن ۔انہاں آکھیا نیب وفاقی ترقیاتی ادارے (سی ڈی اے)، وزارت مذہبی امور و بین المذاہب ہم آہنگی، فیڈرل بورڈ آف ریونیو، پریس انفارمیشن ڈیپارٹمنٹ، صوبائی محکمہ تعلیم، صحت، ریونیو، ہاﺅسنگ اتے کوآپریٹو ڈیپارٹمنٹس اچ میرٹ اتے شفافیت کوں یقینی بنڑاونڑ کیتے وفاقی اتے صوبائی سطح تے 60 توں ودھ تدارکی کمیٹیاں وی بنڑائن ۔
