اسلام آباد۔14دسمبر(اے پی پی)پاکستان اقوام متحدہ دی سلامتی کونسل دیاں قرارداداں دے مطابق جموں و کشمیر تنازعہ دے منصفانہ اتے پرامن حل کیتے کشمیریاں دی سیاسی، سفارتی و اخلاقی حمایت جاری رکھسی۔ ترجمان دفتر خارجہ ہفتہ وار پریس بریفنگ اچ آکھیے جو بھارتی سپریم کورٹ ولوں 2019 دے بھارت دے غیر قانونی اتے یکطرفہ اقدامات دی توثیق جموں و کشمیر دے تنازعہ دی متنازع نوعیت کوں نظر انداز کیتے۔ بھارتی سپریم کورٹ دا جموں و کشمیر تے کوئی وی دائرہ اختیار نئیں ڄیڑھا ہک بین الاقوامی سطح تے منیا ہویا متنازعہ علاقہ اے اتے نہ ہی ہندوستانی آئین دی کوئی شق جموں و کشمیر تے لاگو تھیندی اے، بین الاقوامی قانون دے تحت جموں و کشمیر دے خطے دا حتمی فیصلہ اقوام متحدہ دی سلامتی کونسل دیاں متعلقہ قرارداداں اتے کشمیری عوام دی سک دے مطابق تھیسی۔ انہاں آکھیا جو وزیراعظم انوار الحق کاکڑ کشمیریاں نال پاکستان دی مکمل یکجہتی کیتے آزاد جموں و کشمیر دا دورہ کیتے اتے قانون ساز اسمبلی اچ خطاب کریندے انہاں پاکستان ولوں بھارتی غیر قانونی مقبوضہ جموں و کشمیر دی حیثیت بارے سپریم کورٹ آف انڈیا دے غیر قانونی و ناقابل قبول فیصلے کوں سختی نال مسترد کرݨ دا عزم دوہرائے۔ ترجمان آکھیے جو پاکستان ڈیرہ اسماعیل خان اچ سکیورٹی فورسز تے دہشت گردانہ حملے تے عالمی برادری ولوں ہمدردی اتے پرچاوݨی کوں سراہے۔