اسلام آباد۔8فروری(اے پی پی):پاکستان اچ عام انتخابات سانڳے پولنگ دا آغاز تھی ڳئے جیڑھا جو بغیر کہیں وقفے دے شام 5 وڄے تئیں جاری رہسی ۔12 کروڑ 79 لکھ 21 ہزار 49 رجسٹرڈ ووٹرز17 ہزار 758 امیدواراں اچوں قومی اتے صوبائی اسمبلیاں دے 855 حلقیں اچوں آپݨے امیدواراں دا انتخاب کریسن ، قومی اسمبلی دے ھک اتے صوبائی اسمبلیاں دے ترائے حلقیں سودھے چار انتخابی حلقیں اچ امیدواراں دی اموات پاروں پولنگ ملتوی کرݙتی ڳئی اے ۔ پورے ملک اچ 14 لکھ 90 ہزار انتخابی عملہ تعینات کیتا ڳئے ،پورے ملک اچ 90 ہزار 675 پولنگ سٹیشن اتے 2 لکھ 66 ہزار 398 پولنگ بوتھ بݨائے ڳئن ،ہر حلقہ دا غیر حتمی غیر سرکاری نتیجہ ریٹرننگ افسر دے دفتر توں جاری کیتا ویسی ۔ الیکشن کمیشن دی طرفوں جاری تفصیل موجب پولنگ سویلے 8 وڄے شروع تھئی اے جیڑھی جو بغیر کہیں وقفے دے شام 5 وڄے تئیں جاری رہسی ۔ اسلام آباد توں قومی اسمبلی دیاں 3 نشستاں ہن جنھاں تے 10 لکھ 83 ہزار 29 ووٹرز اپݨے نمائندیں داانتخاب کریسن ۔ پنجاب توں قومی اسمبلی دی 141 اتے پنجاب اسمبلی دیاں 296 نشستاں تے آپݨے نمائندیں دے انتخاب سانڳے 7 کروڑ 32 لکھ 7 ہزار 896 ووٹرز اپݨا ووٹ دا حق استعمال کریسن۔ سندھ توں قومی اسمبلی دی 61 اتے سندھ اسمبلی دی 130 نشستاں تے آپݨے نمائندوں دے انتخاب سانڳے 2 کروڑ 69 لکھ 94 ہزار 769 ووٹرز اپݨا ووٹ دا حق استعمال کریسن ۔خیبرپختونخوا توں قومی اسمبلی دیاں 44 اتے خیبرپختونخوا اسمبلی دی 113 نشستاں تے اپݨے نمائندیں دی چوݨ سانڳے 2 کروڑ 12 لکھ 63 ہزار 408 ووٹرز آپݨے ووٹ دا حق استعمال کریسن۔ قومی اسمبلی دی 265نشستاں تے انتخاب تھیوݨا اے جیں سانڳے 5 ہزار 113 امیدوار میدان وچ ہن جنھاں اچوں 312 تریمتاں وی شامل ہن۔ چارے صوبائی اسمبلیاں اچ مدمقابل امیدواراں دی کل تعداد 12 ہزار 645 اے جنھاں اچ 570 تریمتاں شامل ہن۔بلوچستان توں قومی اسمبلی دی 16 اتے بلوچستان اسمبلی دی 51 نشستاں تے آپݨے نمائندیں دے انتخاب سانڳے 53 لکھ 71 ہزار 947 ووٹرز اپݨے ووٹ دا حق استعمال کریسن ۔ قومی اسمبلی دے حلقہ این اے۔8 باجوڑ، پی کے۔22 باجوڑ، پی کے۔91 کوہاٹ اتے پنجاب اسمبلی دے حلقہ پی پی۔266رحیم یار خان اچ امیدواراں دی وفات پاروں پولنگ ملتوی کرݙتی ڳئی اے ۔ پورے ملک اچ 16 ہزار 766 پولنگ سٹیشن انتہائی حساس ،29 ہزار 985 حساس جݙاں جو 44 ہزار 26 پولنگ سٹیشن نارمل قرارݙتے ڳئن ۔ پنجاب اچ 5 ہزار 624 پولنگ سٹیشن حساس ترین جݙاں جو انہاں تے فی پولنگ سٹیشن 5 تئیں اہلکار تعینات کیتے ڳئے ۔ سندھ اچ 4 ہزار 430 پولنگ سٹیشن انتہائی حساس قرارݙتے ڳئن جݙاں جو اتھاں فی پولنگ سٹیشن 8 تئیں سیکیورٹی اہلکار تعینات ہن۔ ایویں طرح خیبرپختونخوا اچ 4 ہزار 265 حساس ترین پولنگ سٹیشن تے9 تئیں اہلکار فی پولنگ سٹیشن تعینات ہن۔ بلوچستان اچ 1047 انتہائی حساس پولنگ سٹیشناں اچ ہر پولنگ سٹیشن تے9 اہلکار تعینات کیتے ڳئن ۔خمیس کوں پورے ملک اچ عام تعطیل اے۔کمیشن دی طرفوں جاری ضابطہ اخلاق موجب پہلے درجے اچ سکیورٹی دی ذمہ واری پولیس ݙوجھے درجے اچ سول آرمڈ فورسز اتے تریجھے درجے اچ افواج پاکستان دی تعیناتی کیتی ڳئی اے ۔ میڈیا دی طرفوں پولنگ سٹیشناں دے نتیجے پولنگ ختم تھیوݨ دے ھک گھنٹے بعد جاری کیتے ونڄ سڳسن ۔ الیکشن کمیشن دی طرفوں اڄوکے سال عام انتخابات سانڳے 26 کروڑ بیلٹ پیپرز چھاپیے ڳئن ۔
