اسلام آباد۔11جولائی(اے پی پی)پاکستان اتے آذر بائیجان دا تجارت سودھا ٻئے شعبیاں اچ ڳانݙھا ودھاوݨ تے اتفاق، تعاون دیاں مفاہمتی یادداشتاں تے دستخط، وزیر اعظم شہبازشریف آکھیے جو آذر بائیجان نال تجارت ودھیندے ہوئے مشترکہ منصوبیاں کوں اڳونہا کرݨے، ݙوہیں ملک 2 ارب ڈالر تئیں دی باہمی سرمایہ کاری چاہندن۔ اے ڳالھ وزیر اعظم شہبازشریف اتے آذربائیجان دے صدر الہام علیوف اسلام آباد اچ مختلف شعبیاں اچ ساڄھے داری سانڳے مفاہمتی یادداشتاں تے دستخط دی تقریب نال خطاب کریندے آکھی اے۔ایں توں پہلے اسلام آباد اچ پاکستان اتے آذر بائیجان وچال مختلف شعبیاں اچ تعاون دیاں مفاہمتی یادداشتاں تے دستخط دی تقریب تھئی جیندے اچ وزیر اعظم شہباز شریف اتے آذربائیجان دے صدر الہام علیوف وی موجود ہن۔ ݙوہاں ملکاں وچال قونصلر امور سانڳے مفاہمتی یادداشت دا تبادلہ تھئے۔ مفاہمتی یادداشت دا نائب وزیراعظم اسحٰق ڈار اتے آذربائیجان دے نائب وزیر خارجہ تبادلہ کیتے۔
ایں موقع تے الیندے وزیر اعظم شہبازشریف آکھیے جو آذر بائیجان نال اڄ باہمی اعتماد اتے احترام دی بنیاد تے ڳالھ مہاڑ تھئی اے، الہام علیوف پاکستان دے بہترین سنڳتی اتے ٻھرا ہین، صدر آذربائیجان دے 2017 دے دورہ پاکستان نال سوھݨیاں یاداں ہین، پاکستان دے عوام انہاں دے ایں دورے نال خوش ہین اتے پاکستان آوݨ تے انہاں دے مشکور ہیں۔ انہاں اکھیا جو ݙوہاں ملکاں وچال تجارتی حجم 10 کروڑ ڈالر اے ڄیڑھا ساݙی اتنی تکڑی سنڳت دا بالکل عکاس کائنی، ساکوں آذربائیجان نال تجارتی حجم ودھاوݨے اتے ݙوہاں ملکاں ڳالھ مہاڑ اچ تجارت سودھا سارے شعبیاں اچ تعاون ودھاوݨ دا عزم کیتے، ساکوں آذربائیجان نال مشترکہ منصوبیاں کوں اڳو تے ٹورݨے، ساݙے دل ہک ٻئے نال دھڑکدن، ساݙی سوچ ہکو ڄھیں اے اتے پاکستان ہمیشہ آذربائیجان دے ممقاصد دی حمایت کیتی اے، عالمی اتے علاقائی امور ساݙے خیالات وی ہکو سویں ہین اتے ݙوہیں ملک سارے اہم مسلیاں تے ہک ٻعے دے موقف دی حمایت کریندن۔ وزیر اعظم آکھیا جو آذربائیجان دے کشمیر بارے اصولی مؤقف کوں جی بسم اللہ آہدوں، آذربائیجان اتے ترکیہ انہاں سنڳتیاں اچوں ہین ڄئیں ہمیشہ پاکستان دا ہتھ ونݙائے اتے نال کھڑن۔ تقریب نال خطاب اچ آذر بائیجان دے صدر الہام علیوف آکھیے جو پاکستان اچ ٻہوں چنڳاں استوقبال تھئے جیندے تے پاکستان دے لوکاں اتے حکومت دا شکریہ کریندے ہیں، پاکستان اتے آذربائیجان باہمی مفاد دے مختلف شعبیاں اچ 2 ارب ڈالر دی سرمایہ کاری چاہندن، معاشی و تجارتی شعبے سودھا مختلف شعبیاں اچ معاہدیاں دا تبادلہ تھئے، دفاعی صنعت دے شعبے اچ وی ہک ٻئے نال تعاون ودھسیوں۔ انہاں آکھیا جو پاکستان اتے آذربائیجان دی سنڳت تکڑے ایرے تے کھڑی اے، باکو توں پاکستان دے مختلف شہراں کیتے براہ راست پروازاں شروع کیتن اتے ترجیحی تجارت معاہدے نال باہمی تجارتی حجم ودھسی۔ آذربائیجان دے صدر آکھیا جو پاکستان اتے آذربائیجان ہر معاملے تے ہک ٻئے دی حمایت کریندن، کشمیر تے اصولی مؤقف دی حمایت ساݙی پاکستان دے عوام نال محبت دا ثبوت اے، افسوس اے جو کشمیر کیتے سلامتی کونسل دیاں قرارداداں تے عمل نئیں تھیندا پیا، آزر بائیجان ہر اوکھ اچ پاکستان دے نال اے اتے پاکستان وی ہمیشہ ساݙا ہتھ ونݙائے، ساݙی سنڳت اچ آرمینیا نال سفارتی تعلقات نئیں ٻݨائے۔(ج،م/ڈ، س،ک)21:23
.jpg)
