اسلام آباد ۔ 9 اپریل (اے پی پی) صدر مملکت ڈاکٹر عارف علوی نال اسلامی نظریاتی کونسل دے وفد ملاقات کیتی۔ وفد دی سربراہی اسلامی نظریاتی کونسل دے چیئرمین ڈاکٹر قبلہ ایازکریندے پئے ہن۔ ملاقات اچ کورونا دے وبائی مرض نال پیدا تھیونڑ آلی صورت حال تے گال مہاڑ کیتی گئی اے ۔ صورتحال نال نبڑنڑ کیتے علماءکرام مختلف تجویزاں پیش کیتیاں ۔ایں موقع تے عوام توں گزارش کیتی گئی اے او جمعہ کوں ڈو رکعت صلاة التوبہ ادا کرن ۔ علماءکرام لوکاں کوں اپنڑے گھر اچ نمازاں تے اللہ سئیں توں معافی منگنڑ تے توبہ دی تلقین کیتی جیں نال انسانیت کوں موجودہ تباہی توں بچاونڑ اچ مدد مل سگدی اے ۔ اتھاں وفاقی وزیر مذہبی امور پیر نور الحق قادری اج جمعے کوں ایوان صدر اچ جمعے دا خطبہ ڈیسن تے مغفرت کیتے اجتماعی دعا کریسن ،ایں دوران لوکاں دی تعداد گھٹ ہوسی تے ساری احتیاطی تدبیر کوں یقینی بنڑایا ویسی اینکوں براہ راست ٹیلی کاسٹ کیتا ویسی ۔ایں موقع تے صدر مملکت علمائے کرام تے زور ڈتے جو او کرونا وائرس توں بچنڑ دے اقدامات بارے شعور اجاگر کرنڑ اچ اپنڑاں کردار ادا کرن ۔ ملاقات اچ وفاقی وزیر مذہبی امور اتے بین المذاہب ہم آہنگی پیر نور الحق قادری، سیکرٹری وزارت نیشنل ہیلتھ سروسز ڈاکٹر توقیر احمد قریشی، سیکرٹری وزارت داخلہ یوسف نسیم کھوکھر اتے بئے علماءکرام موجود ہن ۔
