راولپنڈی۔8اکتوبر (اے پی پی):وفاقی وزیر داخلہ شیخ رشید احمد ملکی سیاست اچ آندے 120ݙینھ اہم قرار ݙیندے ہوئیں آکھیے جو عمران خان دی قیادت اچ آندے انتخابات وی بھرپور طریقے نال لڑسن تے کامیابی عمران خان دی ہوسی،الیکشن دے نیڑے (ن) لیگ دی نویں الائنمنٹ تھیسی ،اے پڳڑیاں اچھالݨ دا نی سنجیدہ سیاسی سوچ دا ویلھا اے ۔ جے اساں سنجیدہ سیاست کریسوں تاں ایں ملک کوں اڳوں گھن تے ویسوں ، اے ڳالھیں انہاں جمعے کوں راولپنڈی ویمن یونیورسٹی اچ نویں پوسٹ گریجویٹ بلاک دا افتتاح کرݨ دے موقع تے تقریب توں خطاب تے میڈیا نال ڳال مہاڑ کریندے ہوئیں آکھئن ۔وفاقی وزیر داخلہ شیخ رشید احمد آکھیے جو خدانخواستہ جے افغانستان اچ کوئی بحران تھیا تاں اساں ایں بحران توں متاثر تھئے بغیر نہ رہسوں ، میکوں خوشی ایں ڳال دی اے جو عمران خان کورونا وائرس دی وبا دی صورتحال کوں وی ٻہوں چنڳے طریقے نال ہینڈل کیتے تے افغانستان دے مسئلے کوں وی چنڳے طریقے حل کیتا ویندا پئے ،میں اوسیاست دان کائنی جیڑھا مہانگ توں انکار کرے ،ملک اچ مہانگ اے لیکن ان شاءاللہ وزیراعظم عمران خان دی قیادت اچ ایں کوں کنٹرول کریسن تے او لوک جیڑھے ساݙے اداریں دے خلاف زبان استعمال کرتے نمبرٹڳݨ دی کوشش کریندے پئن او منہ بھرݨے ڈھسن ،آسمان کوں تکھیا انہاں دے منہ تے آسی ،پاکستان دی عظیم قوم ،پاکستان دی عظیم فوج عمران خان دی قیادت اچ اساں ان شاءاللہ بہتر پراگریس کریسوں ۔اللہ دا شکر ادا کرینداں جو میݙی زندگی اچ تعلیم دا مشن مکمل تھی ڳئے،ایں مہینے اچ راولپنڈی دی تریجھی یونیورسٹی ،وقار النساءیونیورسٹی داافتتاح وزیراعلیٰ پنجاب کریسن۔
