اسلام آباد۔30مارچ (اے پی پی):صدر مملکت ڈاکٹر عارف علوی آکھیے جو پاکستان ٹیکنالوجی دے میدان اچ وݙی کامیابی حاصل کرݨ دی صلاحیت رکھیندے ،ٹیکنالوجی دا استعمال انسانیت دی ترقی کیتے ہووݨا چاہیدے ، بھارت دی طرفوں میزائل پاکستان آوݨ انتہائی غیرذمہ دارانہ فعل اے، غیرذمہ دارانہ اقدامات کہیں وی وݙی تباہی دا باعث بݨ سڳدن ، اساݙی پہلی ترجیح ملکی دفاع کوں مستحکم بݨاوݨ اے ۔ اے ڳالھ انہاں ٻدھ کوں اتھاں پاکستان سپیس اینڈ اپر ایٹمو سفیئر ریسرچ کمیشن ، سپارکو دے زیراہتمام ”بین الاقوامی سپیس کانفرنس” توں خطاب کریندے ہوئیں آکھی اے کانفرنس اچ چیئرمین سپارکو میجر جنرل (ر) عامر ندیم، خلائی تحقیق دے سائنسداناں، غیر ملکی مندوبین اتے ٻئی نمایاں شخصیات شرکت کیتی۔ صدر مملکت آکھیے جو اساں خلا دا پرامن استعمال چاہندوں ، پاکستان کوں آپݨے سیٹلائٹس بݨاوݨے ہن تے اساکوں خودانحصاری دی منزل حاصل کرݨی ہوسی ۔ انہاں آکھیے جو پاکستانی قوم مضبوط عزم دی حامل اے اتے او کہیں وی چیلنج تے قابو پاوݨ دی صلاحیت رکھیندی اے ۔
