اسلام آباد۔19اپریل(اے پی پی):وفاقی وزیر داخلہ محسن نقوی آکھیے پولیس سودھے سارے سکیورٹی ادارے چینی شہریاں دی حفاظت دے ایس او پیز تے سو فیصد عملدرآمد یقینی بݨاون، غیرملکی شہریاں دے تحفظ اچ غفلت تے تادیبی کارروائی کیتی ویسی۔ دہشت گردی مکاوݨ سانڳے اساکوں آپݨے اداریں کوں جدید ٹیکنالوجی نال لیس کرݨا ہوسی، کچے دے علاقے اچ مشترکہ آپریشن کیتا ویسی۔ او نیکٹا ہیڈکوارٹر اچ نیشنل ایکشن پلان تے عمل درآمد دی جائزہ کمیٹی دے اہم اجلاس توں خطاب کریندے پئے ہن ۔وفاقی سیکرٹری داخلہ، سربراہ نیکٹا، ڈی جی ایف آئی اے، پنجاب، سندھ، خیبرپختونخوا، بلوچستان، آزاد کشمیر، گلگت بلتستان تے اسلام آباد دے آئی جیز ، سیکرٹریز داخلہ ، نیشنل کوآرڈینٹر نیکٹا، نیشنل ایکشن پلان اتے انٹیلیجنس اداریں دی ساری ٹیم اتے چیف کمشنرز وی اجلاس اچ شرکت کیتی ۔ اجلاس اچ کچے دے علاقے اچ مشترکہ آپریشن کرݨ دا فیصلہ کیتا ڳئے ۔اجلاس اچ پاکستان اچ پولیس کوں جدید ٹیکنالوجی ݙیوݨ بارے بریفنگ ݙتی ڳئی ۔ پورے پاکستان دی پولیس کوں نویں ٹیکنالوجی ݙیوݨ سانڳے تفصیلی مشاورت کیتی ڳئی اے ۔ اجلاس اچ چینی شہریاں دی سکیورٹی دے حوالے نال کیتے ڳئے اقدامات دا جائزہ ڳھدا ڳئے ۔ سارے آئی جیز چینی شہریاں دی سکیورٹی تے حفاظت دے اقدامات بارے تفصیلی بریفنگ ݙتی۔وضع کیتے ڳئے ایس او پیز تے عملدرآمد نہ کرݨ آلیں دی نقل و حرکت کوں محدود کرݨ دا فیصلہ کیتا ڳئے ۔ اجلاس اچ ایرانی صدر دے دورے دے دوران اسلام آباد، کراچی اتے لاہور اچ سکیورٹی دے فول پروف انتظامات دا جائزہ ڳھدا ڳئے۔ وزیر داخلہ محسن نقوی آکھیے سکیورٹی انتظامات دے حوالے نال وفاق صوبیں نال ہر ممکن تعاون کریسی۔
