لاہور۔17اگست(اے پی پی) پی ڈی ایم اے آندے 24 گھنٹے صوبائی دارالحکو مت لاہور سودھے پنجاب دے ٻہوں سارے ضلعیں اچ مینھ وسݨ دی پیشگوئی کیتی اے اتے مینھ وسݨ دا اے سلسلہ 20 اگست تئیں جاری رہسی ۔ ترجمان موجب ہفتے کوں پنجاب دے ٻہوں ضلعیں اچ زور دا مینھ وٹھا ، ساریں توں ودھ مینھ رحیم یار خان79 ،ساہیوال اچ 79، ٹوبہ ٹیک سنگھ 77ِ خانیوال 67، فیصل آباد 57، ڈیرہ غازی خان،57، لاہور 50، گوجرانولہ 50،سیالکوٹ 41،،ملتان 37 ، بہاولپور 26، بھکر 14 اتے جوہرآباد اچ 8ملی میٹر مینھ وُٹھے ۔ ترجمان موجب آندے 24 گھنٹے پنجاب دے ٻہوں سارے ضلعیں لاہور، راولپنڈی، فیصل آباد، گوجرانولہ، ملتان، بہاولپور، سرگودھا، گجرات، ڈیرہ غازی خان اتے ساہیوال اچ مزید مینھ وسݨ دا امکان اے ۔ ڈی جی پی ڈی ایم اے عرفان علی کاٹھیا آکھیے پورے صوبے دے ڈپٹی کمشنرز کوں الرٹ رہݨ دی ہدایت کیتی ڳئی اے ۔پی ڈی ایم اے کنٹرول روم اچ صورتحال دی مانیٹرنگ مسلسل جاری اے۔ ڈی جی آکھیے پاݨی آلے علاقیں اچوں وختی پاݨی دی نکاسی یقینی بݨائی ونڄے ۔ ساوݨ دے مینھ پاروں پنجاب دے دریاواں، ندی، نالیں اچ طغیانی دا ݙر اے۔ ترجمان ݙسائے دریائے سندھ اچ تلویں درجے دی چھل دی صورت حال برقرار اے دریائے چناب اچ آندے 24 گھنٹے اچ اُتلے درجے دی چھل دا ݙر اے ،دریائے چناب اچ پاݨی دی سطح 2لکھ 50 ہزار کیوسک تئیں ودھݨ دا امکان اے ،آوݨ آلی چھل دی صورت حال پاروں سارے انتظامات کر ڳھدے ڳئن ، انھاں آکھیے شہری احتیاط ورتن ، بجلی دے کھمبیں اتے لڑکدیاں تاراں، کچے مکان تے پراݨٰیاں عمارتاں توں ھک پاسے رہن ، ٻالیں دا خاص خیال رکھن تے انہاں کوں نیڑے پاݨی آلے علاقے اچ اصلوں نہ ونڄݨ ݙیون۔
