اسلام آباد۔23مئی (اے پی پی) وزارت مذہبی امور نویں حج پالیسی دا مسودہ منظوری کیتے وفاقی کابینہ کوں بھجوا ݙتے ،وفاقی کابینہ توں حج پالیسی دی منظوری دے بعد نویں حج پیکج دا اعلان کیتا ویسی ۔ ذرائع موجب سعودی عرب دی طرفوں حج اخراجات دی تفصیلات وزارت مذہبی امور کوں بھجوا ݙتی ڳئی اے ۔ عالمی سطح تے مہانگ ، شرح مبادلہ اچ ودھارا ، سعودی عرب اچ ماضی دے مقابلے اچ نویں ٹیکسں دا نفاذ ، حج خرچے اچ ودھارے دا باعث بݨسی ۔پہلے جتھاں لازمی حج خرچے 2 ہزار ریال ہوندے ہن ہݨ اے ودھ تے 6 ہزار ریال تئیں پڄ ویسن ،ریال دی قیمت پہلے 38 روپے ہئی ہݨ اے ودھ تے 52 روپے تھی ڳئی اے ۔ݙر ظاہر کیتا ویندا پئے جو اجوکے سال سرکاری سکیم دے تحت حج پیکج 8 لکھ روپے توں ودھ ویسی تاں جو ایں حوالے نال کوئی وی حتمی فیصلہ وفاقی کابینہ کریسی ۔نویں حج پالیسی دامسودہ منظوری کیتے وفاقی کابینہ کوں بھجوا ݙتا ڳئے ۔ وفاقی کابینہ دی سفارشات کوں سامݨے رکھیندے ہوئیں حتمی حج پالیسی دا اعلان کیتا ویسی ۔
