مظفر آباد – 15 آڪٽوبر (اي پي پي) صدر ممنون حسين چيو آهي ته سي پيڪ منصوبي جي مڪمل ٿيڻ سان آزاد ڄمون ۽ ڪشمير سميت پاڪستان ترقي جي بي مثال دور ۾ داخل ٿيندو ۽ پاڪستان خطي جو سڀ کان اهم ملڪ بڻجي ويندو. مظفرآباد ۾ آزاد ڄمون ۽ ڪشمير قانونساز اسيمبلي جي ميمبرن سان ملاقات دوران ڳالهائيندي صدر چيو ته پاڪ چين اقتصادي لنگهه سان ترقي جون نيون راهون کلنديون ۽ هلندڙ سال جي آخر تائين گوادر پورٽ مڪمل طور تي فنڪشنل ٿي ويندو. آزاد ڄمون ۽ ڪشمير جو صدر محمد مسعود خان، آزاد ڄمون ۽ ڪشمير جو وزيراعظم راجا فاروق حيدر ۽ اسپيڪر شاهه غلام قادر پڻ اجلاس ۾ موجود هئا.
